(நா.தனுஜா)

சீனா கல்வி சார்ந்த உதவிகள் மாத்திரமன்றி பொருளாதாரம், மருத்துவம், உட்கட்டமைப்பு, வீதி அபிவிருத்தி போன்ற பல்வேறு துறைகளிலும் இலங்கைக்கு நிதி மற்றும் தொழில்நுட்ப ரீதியான உதவிகளை வழங்கி வருகின்றது என உயர்கல்வி மற்றும் கலாசார அலுவல்கள் அமைச்சின் மேலதிக செயலாளர் மாதவ தேவசுரேந்திர தெரிவித்தார். 

2018 மற்றும் 2019 ஆம் கல்வியாண்டுக்குரிய இலங்கை மாணவர்களுக்கான சீன அரசாங்கத்தின் புலமைப்பரிசில் வழங்கும் நிகழ்வு இன்று கொழும்பிலுள்ள சீன தூதரகத்தில் இடம்பெற்றது. இந் நிகழ்வில் கலந்துகொண்டு உரையாற்றுகையிலேயே அவர் மேற்கண்டவாறு கூறினார்.

அவர் மேலும் குறிப்பிடுகையில், 

சீனாவின் பட்டுப்பாதை திட்டத்தில் இடம்பெறுகின்ற முக்கிய நாடாக இலங்கை உள்ளது. இலங்கை சுதந்திரமடைந்த பின்னர் இருநாடுகளுக்கும் இடையில் மேற்கொள்ளப்பட்ட இறப்பர் - அரிசி உடன்படிக்கையிலிருந்து பரஸ்பரம் இருநாடுகளுக்கிடையில் நல்லுறவு நிலவி வருகின்றது. 

அம்பாந்தோட்டை துறைமுகம், மத்தள விமான நிலையம், துறைமுக நகரம், அதிவேக நெடுஞ்சாலை என்பன சீனாவின் உதவியுடன் அமைக்கப்பட்டவை ஆகும். குறிப்பாக தற்போது நிர்மாணிக்கப்பட்டு வருகின்ற தாமரைக்கோபுரம் இலங்கைக்கும் சீனாவுக்கும் இடையிலான நினைவுச்சின்னமாக எப்போதும் திகழும் என்றார்.