மஸ்கெலியா பொலிஸ் நிலைய பொறுப்பதிகாரி டிரோன் ரத்நாயக்கவை இடமாற்றம் செய்யக் கோரி மஸ்கெலியா அப்கட் பிரதான வீதியை மறித்து செய்யப்பட்ட வீதி மறியல் போராட்டம் தற்பொழுது நிறைவுக்கு வந்துள்ளது.

நுவரெலியா மாவட்ட பாராளுமன்ற உறுப்பினரும், இ.தொ.காவின் தலைவரும், பொது செயலாளருமான ஆறுமுகன் தொண்டமான் கலந்து கொண்ட இந்த வீதி மறியல் போராட்டம் இ.தொ.காவின் ஆதரவாளர்களால் முன்னெடுக்கப்பட்டது.

கட்சி சார்பாக தமது அரசாங்க தொழிலை துஷ்பிரயோகம் செய்வதாக இ.தொ.கா.வின் ஆதரவாளர்கள் கொடுத்த புகாருக்கு அமைவாகவே இந்த வீதி மறியல் போராட்டம் இன்று மாலை 6 மணியளவில் சுமார் 2 மணி நேரமாக பொலிஸ் நிலையத்திற்கு முன்பாக முன்னெடுக்கப்பட்டது.

இதன்போது நிலைமையை கட்டுப்பாட்டுக்குள் கொண்டு வர பொலிஸ் பாதுகாப்பு வழங்கப்பட்டிருந்த போதிலும், அட்டன் பொலிஸ் தலைமையகத்திலிருந்து பொலிஸ் அத்தியட்சகர் மற்றும் உதவி பொலிஸ் அத்தியட்சகர் ஆகியோர் ஸ்தலத்திற்கு விரைந்து ஆறுமுகன் தொண்டமானின் கோரிக்கையை ஏற்று உடனடியாக மேல்மட்ட நடவடிக்கையை மேற்கொள்வதாக கூறிய உத்தரவாதத்திற்கு அமைவாக இந்த வீதி மறியல் போராட்டம் கைவிடப்பட்டது.