இந்தியாவின்  உத்தரபிரதேசம் மாநிலத்தில் மாணவி ஒருவருக்கு தான் படிக்கும் பாடசாலை முதல்வரின் மகன் பாலியல் தொல்லை கொடுத்ததால் மனமுடைந்த மாணவி தீக்குளித்து தற்கொலை செய்து கொண்டுள்ளார்.

உத்தரபிரதேச மாநிலம் தியோரா மாவட்டத்தில் உள்ள தனியார் பாடசாலை ஒன்றில் தரம் 12இல் கல்வி பயின்று வந்த மாணவிக்கு அப் பாடசாலை முதல்வரின் மகன் தொடர்ந்து பாலியல் தொல்லை கொடுத்து வந்துள்ளான்.

சம்பவத்தன்று குறித்த  மாணவிக்கு பள்ளி முதல்வர் அழைப்பதாக அழைப்பு ஒன்று வந்துள்ளது. இதனையடுத்து அவர் முதல்வரின் அறைக்கு சென்றுள்ளார்.

ஆனால் அங்கு பள்ளி முதல்வருக்கு பதிலாக அவரது மகன் தான் இருந்துள்ளார். அப்போது அவர் அந்த மாணவியிடம் பாலியல் அத்துமீறலில் ஈடுபட்டுள்ளார்.

இது குறித்து வெளியில் யாரிடமும் சொல்லக்கூடது என்றும் மிரட்டியுள்ளார்.ஆனால் இதனை கவனித்த சிலர் பாதிக்கப்பட்ட மாணவியின் சகோதரனிடம் கூறியுள்ளனர்.

இதனையடுத்து மாணவியின் சகோதரன் ஆத்திரத்தில் பள்ளி முதல்வரின் மகனுடன் சண்டைப்போட்டுள்ளார். இதனால் மனமுடைந்த அந்த மாணவி வீட்டில் தனது அறையில் தீக்குளித்து தற்கொலை செய்து கொண்டுள்ளார்.

இதனையடுத்து மாணவியின் குடும்பத்தார் அளித்த முறைப்பாட்டின்  பேரில் வழக்கு பதிவு செய்த பொலிஸார் அறுவரை  கைது செய்து விசாரணை நடத்தி வருகின்றனர்.