19 வயதிற்குட்பட்டோருக்கான உலகக் கிண்ண கிரிக்கெட் போட்டியில் இலங்கை அணி 7 விக்கெட்டுகள் வித்தியாசத்தில் அயர்லாந்து அணியை அபார வெற்றி கொண்டது.

19 வயதிற்குட்பட்டோருக்கான உலகக் கிண்ண கிரிக்கெட் தொடர் நியூசிலாந்தில் இடம்பெற்று வருகின்றது.

இந்நிலையில் இன்று குழு “டி” யில் இடம்பெற்றிருந்த இலங்கை மற்றும் அயர்லாந்து அணிகள் மோதின.

இப் போட்டியில் நாணயச் சுழற்சியில் வெற்றிபெற்ற அயர்லாந்து அணி முதலில் துடுப்பெடுத்தாடத் தீர்மானித்தது. 

அதன்படி முதலில் துடுப்பெடுத்தாடக் களமிறங்கிய அயர்லாந்து அணி, 48 ஓவர்களில் 8 விக்கெட்டுகளை இழந்து 207 ஓட்டங்களைப் பெற்றது.

அயர்லாந்து அணி சார்பாக கிரேஸி 75 ஓட்டங்களையும் டொன்கன் 36 ஓட்டங்களையும் பெற்றுக்கொடுத்தனர்.

பந்து வீச்சில் இலங்கை அணி சார்பாக கமிந்து மென்டிஸ் 3 விக்கெட்டுகளைக் கைப்பற்றினார்.

பதிலுக்கு 208 ஓட்டங்களைப்பெற்றால் வெற்றி என்ற இலக்குடன் களமிறங்கிய இளம் இலங்கை அணி, ஆரம்பத்துடுப்பட்ட வீரரான லக்ஷனின் சதத்தின் உதவியுடன் 3 விக்கெட்டுகளை மாத்திரமே இழந்து வெற்றி இலக்கை அடைந்து 7 விக்கெட்டுகளால் அபார வெற்றி பெற்றது.

இலங்கை அணிசார்பாக துடுப்பாட்டத்தில் அசத்திய லக்ஷசன் ஆட்டமிழக்காது 101 ஓட்டங்களையும் கமிந்து மென்டிஸ் ஆட்டமிழக்காது 74 ஓட்டங்களையும் பெற்றுக்கொடுத்தனர்.

அயர்லாந்து அணி சார்பாக கௌலி 2 விக்கெட்டுகளை வீழ்த்தினார்.

இப் போட்டியின் ஆட்டநாயகனாக லக்ஷன் தெரிவுசெய்யப்பட்டார்.