தவறவிடாதீர்கள்..!உடனே பதிவு செய்யுங்கள்

சட்டையின் வாட்டிப் பகுதியைப் பிரித்து விடும்படி அறிவுரை சொன்ன ஆசிரியைக்கு, குறித்த மாணவியின் தந்தை அச்சுறுத்திய சம்பவம் மதுரங்குளி பாடசாலை ஒன்றில் இடம்பெற்றுள்ளது.

பதினோராம் ஆண்டில் கல்வி கற்கும் மாணவியொருவர் கடந்த பதின்மூன்றாம் திகதி பாடசாலை விதிமுறைகளுக்குப் புறம்பாக குறைவான உயரமுள்ள சீருடையை அணிந்து வந்திருக்கிறார். இதை அவதானித்த ஒழுக்க விதிகளுக்குப் பொறுப்பான ஆசிரியை, சீருடையின் கீழ் வாட்டிப் பகுதியை அவிழ்த்துவிடுமாறு அறிவுரை கூறினார்.

இது குறித்து மாணவி தன் தந்தைக்கு அலைபேசி மூலம் தகவல் கொடுத்துள்ளார்.

இதையடுத்து, மறுநாள் காலை பெற்றோர் சந்திப்பு நடைபெற்றுக்கொண்டிருந்தபோது பாடசாலைக்கு வந்த மாணவியின் தந்தை, குறித்த ஆசிரியை கெட்ட வார்த்தைகளால் திட்டியதுடன் அவரைக் கடுமையாக அச்சுறுத்தியிருக்கிறார்.

இதையடுத்து பாடசாலை அதிபர், பிரதேச கல்விச் செயலகம் மற்றும் பொலிஸ் நிலையத்தில் குறித்த ஆசிரியை புகார் அளித்தார்.

இதன்படி பாடசாலைக்கு வந்த பொலிஸார், பிரச்சினைக்குள்ளான ஆசிரியையிடமும் சக ஆசிரியர்களிடமும் விசாரணை நடத்தியுள்ளதுடன், குறித்த மாணவியின் தந்தையையும் விசாரணைக்கு உட்படுத்தவுள்ளனர்.