ட்ரயல் அட்பார் நீதிமன்றை நிறுவி அரசியல் கைதிகள் பிரச்சினைக்கு தீர்வுகாணுங்கள்.!

தேசிய மட்டத்தில் அவதானத்தை ஏற்படுத்தியுள்ள தமிழ் அரசியல் கைதிகளின் விவகாரத்தை ட்ரயல் அட்பார் நீதிமன்றம் ஒன்றை நிறுவி மூன்று மாதகாலத்தில் தீர்த்துவிடவேண்டும். இந்தப் பிரச்சினையை தொடர்ந்து இவ்வாறு நீடித்துக்கொண்டிருப்பது முறையல்ல என்று கூட்டு எதிரணியின் முக்கியஸ்தரும் பாராளுமன்ற உறுப்பினருமான கெஹலிய ரம்புக்வெல்ல தெரிவித்தார்.

அரசியல் கைதிகள் விவகாரம் தொடர்பில் விபரிக்கையிலேயே அவர் மேற்கண்டவாறு குறிப்பிட்டார். அவர் இது தொடர்பில் மேலும் குறிப்பிடுகையில்:-

அரசியல் கைதிகள் விவகாரம் விரைவாக தீர்க்கப்படவேண்டும் என்பதை ஏற்றுக்கொள்கின்றோம். யுத்தத்தின் பின்னர் 12 ஆயிரம் முன்னாள் போராளிகளை எமது அரசாங்கம் விடுவித்தது. அவ்வாறு 12 ஆயிரம் முன்னாள் போராளிகளை விடுவித்த எமது அரசாங்கம் ஏன் 170 பேரை விடுவிக்கவில்லை என்பதற்கு காரணம் இல்லாமல் இல்லை.

கடுமையான குற்றச்சாட்டுக்கள் சுமத்தப்பட்டவர்களே இவ்வாறு தடுத்துவைக்கப்பட்டுள்ளனர். எனினும் இவர்கள் மீது சட்ட நடவடிக்கை எடுக்காமல் தொடர்ந்து இருப்பது முறையானதல்ல. எனவே இவர்கள் தொடர்பில் சட்டரீதியான ஒரு முடிவு விரைவில் எடுக்கப்படவேண்டும்.

குறிப்பாக தற்போதைய இந்தப் பிரச்சினை தேசியப் பிரச்சினையாக மாறியுள்ளது. எனவே இதுதொடர்பில் விரைந்து சட்ட நடவடிக்கை எடுக்கப்படவேண்டும். அதனால் தமிழ் அரசியல் கைதிகள் விவகாரத்தில் ட்ரயல் அட்பார் நீதிமன்றம் ஒன்றை நிறுவி இந்தப் பிரச்சினையை மூன்று மாதகாலத்தில் தீர்ப்பதற்கு நடவடிக்கை எடுக்கலாம். இதுதொடர்பில் அரசாங்கம் ஆராயவேண்டியது அவசியமாகும்.

அதனை தவிர்த்து இந்தப் பிரச்சினையை தொடர்ந்து நீடித்துக்கொண்டிருப்பதில் அர்த்தமில்லை என்பதை வலியுறுத்து கின்றோம் என்றார்.