இலங்கை கிரிக்கெட் அணி சர்வதேச அணியாகவும் கிரிக்கெட் வீரர்கள் உலக வீரர்களாகவும் அங்கீகாரம் பெற்று மிக நீண்ட காலமாக தனக்கென தனியானதொரு இடத்தை தக்கவைத்து கொண்டு வந்துள்ளது.

ஆனால் கடந்த சில நாட்களாக மெது மெதுவா தனது தனி இடத்திலிருந்து சரிந்து கொண்டு வருகிறதை அவதானிக்க கூடியதாகவுள்ளது.

இலங்கை அணியின் தொடர்ச்சியான சரிவுகளுக்கான காரணங்களை ஆராய்ந்து சரிந்து கொண்டுவரும் இலங்கை அணியை மீண்டும் வெற்றிப்பாதைக்கு அழைத்துச் செல்ல என்னென்ன உத்திகளை கையாள்வது தொடர்பான தீர்மானங்களை எட்டக்கூடிய வேலைத்திட்டம் ஒன்றை விளையாட்டு துறை அமைச்சர் தயாசிறி ஜயசேகர ஏற்பாடு செய்துள்ளார்.

குறித்த வேலைத்திட்டத்திற்காக கிரிக்கெட் சபையின் முன்னாள் தலைவர்கள், உள்ளுர் கிரிக்கெட் சபையின் முன்னாள் தலைவர்கள் மற்றும் செயலாளர்கள், முன்னாள் தேசிய கிரிக்கெட் அணித்தலைவர்கள், அனைத்து கிரிக்கெட் சிரேஷ்ட ஊடக ஒருங்கிணைப்பாளர்கள், கிரிக்கெட் தெரிவுக் குழுவின் முன்னாள் மற்றும் இந்நாள் தலைவர்கள், தேசிய கிரிக்கெட் அணியின் பயிற்றுவிப்பாளர்கள், தேசிய விளையாட்டு துறைகளில் நிபுணத்துவமுடைய நிபுணர்கள், மாகாண மற்றும் மாவட்ட கிரிக்கெட் கழகத் தலைவர்கள் ஆகியோருக்கு அழைப்பு விடுக்கப்பட்டுள்ளது.

குறித்த வேலைத்திட்டம் எதிர்வரும் 15 ஆம் திகதி பத்தரமுல்லை “வோடர்ஸ் எட்ஜ்” ஹோட்டலில் காலை 9.30 மணியளவில் ஆரம்பமாகி மாலை 4 மணி வரையில் நடைபெறவுள்ளது.