இன்றைய திகதியில் திருமணத்திற்கு பிறகு பெண்கள் கருத்தரிக்காமல் இருப்பதற்கு பொலிஸிஸ்டிக் ஓவரியன் சிண்ட்ரோம் எனப்படும் கருப்பையில் உருவாகும் நீர்க்கட்டிகளும் ஒரு முக்கிய காரணமாக இருக்கிறது.

இதற்கான அறிகுறிகள் திருமணத்திற்கு முன்னரே பெண்களிடத்தில் தோன்றும். அதாவது பூப்பெய்தல் முதல் அல்லது 15 வயதிலிருந்து மாதவிடாய் நிற்கும் காலக்கட்டம் வரையிலான பெண்களுக்கு கருப்பையில் நீர்க்கட்டிகள் ஏற்படும். முறையற்ற மாதவிடாய், மாதவிடாயின் போது தொடர்ந்து ஏற்படும் ரத்தபோக்கு, முகத்தில் முடிகள் தோன்றுவது, அடிவயிறு மற்றும் பிறப்புறுப்பில் தொடர்ந்து வலி மற்றும் உடற்பருமன் போன்ற காரணங்களால் இவை உருவாகின்றன என்று கண்டறியப்பட்டிருக்கிறது. 

இதற்கான சிகிச்சையை திருமணத்திற்கு முன்னரே எடுக்கத் தொடங்கினால் திருமணத்திற்கு பின்னர் மகப்பேற்றின் போது தடையில்லாமல் இருக்கும். ஒரு சிலர் திருமணத்திற்கு பிறகு இதனை கண்டறிந்தால், இதன் நிலையைத் தெரிந்துகொண்டு உணவுக்கட்டுப்பாடு, உடற்பயிற்சி, சிகிச்சை ஆகியவற்றின் மூலம் குணமடைந்து தாய்மையடையலாம்.

உணவுக்கட்டுப்பாட்டைப் பொறுத்தவரை கொழுப்புசத்து அதிகமுள்ள உணவையும், சுத்திகரிக்கப்பட்ட எண்ணெய்யில் தயாரான உணவையும் முற்றாகத்தவிர்க்கவேண்டும். அதற்கு பதிலாக உளுந்து, எள், வெண் பூசணிக்காய் விதை, விதையுள்ள பப்பாளி பழம், அன்னாசி பழம்,மாதுளம் பழம் ஆகியவற்றை சேர்த்துக் கொள்ளலாம். அதே போல் உடல் எடையைக் கண்காணித்து சரியான எடையை பராமரிக்கவேண்டும். இதற்காக மருத்துவர்கள் பரிந்துரைக்கும் சிகிச்சைகளை பின்பற்றினால் இந்த கருப்பை நீர்க்கட்டிகள் குணமடைந்து இயற்கையான முறையிலேயே கருத்தரித்து தாய்மைபேறடையலாம்.

வைத்தியர். கீதா ஹரிப்ரியா

தொகுப்பு அனுஷா.

தகவல் : சென்னை அலுவலகம்