வடக்கு, கிழக்கில் இடம்பெறும் மக்கள் போராட்டங்கள் தவறல்ல

16 Nov, 2015 | 02:10 PM

அரசியல் கைதிகளின் விடுதலைக்காக வடக்கு கிழக்கில் மக்கள் முன்னெடுக்கும் போராட்டங்களை மக்களின் குரலாகவே கவனிக்கப்பட வேண்டும்.

அப்பாவி தமிழர்கள் அநாவசியமாக தண்டிக்கப்படாது உடனடியாக விடுதலை செய்யப்படவேண்டும் என தூய்மைக்கான நாளை அமைப்பின் தலைவர் அத்துரலியே ரத்ன தேரர் தெரிவித்தார். இந்த அரசாங்கமாவது தமிழ் மக்களின் விடயத்தில் கவனம் செலுத்த வேண்டும் எனவும் தெரிவித்தார்.

அரசியல் கைதிகளின் விடுதலை தொடர்பில் இன்று நாட்டில் பல்வேறு கருத்துகள் முன்வைக்கப்பட்டு வருகின்ற நிலையில் கைதிகளின் விடுதலை தொடர்பில் வினவிய போதே அவர் மேற்கண்டவாறு குறிப்பிட்டார்.

அவர் மேலும் கூறுகையில்,

நாம் கடந்த காலங்களில் பல சிக்கலுக்கு முகம் கொடுத்திருந்தோம். கடந்த முப்பது ஆண்டுகாலமாக இந்த நாடு தவறான பாதையில் பயணித்து வந்தது. ஆயுத மோதல்களிலும் கொள்ளை, கொலை என பல சிக்கல்களுக்கு முகம்கொடுத்துள்ளோம். எனினும் இப்போது அவ்வாறான நிலைமைகள் எதுவம் நாட்டில் இல்லை. கடந்த காலங்களில் இலங்கையின் குழப்பங்களும் அச்சுறுத்தலும் ஏற்பட சிங்கள தலைமைகளும் பொறுப்புக் கூற வேண்டும்.

அவசியமான உரிமைகளை வடக்கு மக்களுக்கு அன்று பெற்றுக் கொடுத்திருந்தால் இவ்வாறான இழப்புகள் எவையும் இடம்பெற்றிருக்காது. அதேபோல் கடந்த பத்து ஆண்டுகளில் இலங்கையின் அரசியல் பாதை மிகவும் மோசமானதாகவே அமைந்தது. நாட்டின் வளங்கள் கொள்ளையடிக்கப்பட்டன, மதக்கலவரங்களையும் இன முரண்பாடுகளையும் தோற்றுவிக்கும் வகையில் அரசாங்கம் மிகவும் மோசமாக நடந்துகொண்டது. அபிவிருத்திகள் என்ற பெயரில் இலங்கையின் வளங்களை வெளிநாடுகளுக்கு விற்றனர். அதேபோல் வடக்கில் தமிழ் மக்கள் எதிரிகள் என்ற கண்ணோட்டத்திலேயே இவர்கள் பார்த்தார்கள்.

யுத்தத்தில் காணமல்போன பொதுமக்கள், பாதிக்கப்பட்ட மக்கள் தொடர்பில் கடந்த அரசாங்கம் எவ்வாறு செயற்பட்டது என்று கேட்டால் எம்மால் உறுதியாக எதையும் தெரிவிக்க முடியாது. அதேபோல் யுத்த காலகட்டத்தில் சந்தேகத்தின் பெயரில் கைது செய்யப்பட்ட பொதுமக்கள் தொடர்பிலும் முன்னைய அரசாங்கம் எந்தவித நடவடிக்கைகளையும் முன்னெடுக்கவில்லை.

இப்போது புதிய அரசாங்கம் இந்த விடயங்களில் அதிக அக்கறை செலுத்த வேண்டும். இந்த நாட்டில் தமிழ் மக்கள் ஒருவிதத்திலும் சிங்கள மக்கள் ஒரு விதத்திலும் கவனிக்கப்படக் கூடாது. அனைத்து மக்களையும் சம உரிமைகளுக்கு அமையவே கவனிக்கப்பட வேண்டும். உண்மையில் குற்றவாளிகளாக நிரூபிக்கப்பட்ட நபர்கள் சட்டதிட்டங்களுக்கு அமைய நடவடிக்கைகளை மேற்கொள்ள வேண்டும். ஆனால் குற்றவாளிகள் இல்லாத தமிழ் கைதிகளை உடனடியாக விடுவிக்கப்பட்ட வேண்டும்.

இன்று வடக்கிலும் கிழக்கிலும் இடம்பெற்றுவரும் மக்கள் போராட்டங்களை எக்காரணத்தை கொண்டும் குற்றம் சுமத்தமுடியாது. அவர்களின் உறவுகளை விடுவிக்கக்கோரி கோரிக்கை விடுப்பது நியாயமான ஒன்றாகும். அவர்களின் குரல் தமிழ் மக்களின் குரல்கள் என்ற ரீதியில் கவனிக்கப்படவேண்டும் ஆகவே அரசாங்கம் இந்த விடயங்களை கவனத்தில் கொண்டு செயற்பட வேண்டும் எனக் குறிப்பிட்டார்.