முத்துமாரி அம்மன் ஆலயத்தில் கொள்ளை : கிளிநொச்சியில் சம்பவம்

15 May, 2017 | 09:53 AM

கிளிநொச்சி, முரசுமோட்டை, சேற்றுக்கண்டி முத்துமாரி அம்மன் ஆலயத்தின் மூலஸ்தானம் மற்றும் களஞ்சிய அறை உடைக்கப்பட்டு நகை, பணம் கொள்ளையிடப்பட்டுள்ளதாக கிளிநொச்சி பொலிஸார் தெரிவித்தனர்.

குறித்த கொள்ளைச் சம்பவம் நேற்று முன்தினமிரவு இடம்பெற்றிருக்கலாம் என பொலிஸார் சந்தேகிக்கின்றனர்.

நேற்று முன்தினம் மாலை ஆலய பூசை முடிந்த பின்னர் கதவுகள் பூட்டப்பட்ட நிலையில் நேற்றுக்காலை ஆயலத்திற்கு சென்று பார்த்த போது ஆலயத்தின் மூலஸ்தான கதவுகள் உடைக்கப்பட்டு இருந்ததாக மக்கள் தெரிவித்துள்ளனர்.

இதேவேளை, அம்பாளுக்கு அணியப்பட்டிருந்த தங்க நகைகள் களவாடப்பட்டு இருந்ததாகவும், களஞ்சிய அறை உடைக்கப்பட்டு அதிலிருந்த ஒரு தொகை பணமும் கொள்ளையிடப்பட்டிருந்ததாகவும் ஆலய நிர்வாகத்தினர் தெரிவித்துள்ளனர்.இச் சம்பவம் தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.