உலகளாவிய ரீதியில் மோசமானதொரு இணையவழித் தாக்குதல் ஒன்று மேற்கொள்ளப்பட்டுள்ளதால் 99 நாடுகள் பாதிக்கப்பட்டுள்ளதாக சர்வதேச செய்திகள் தெரிவிக்கின்றன.

பிரிட்டன், ஸ்பெய்ன், ரஷ்யா, அமெரிக்கா மற்றும் சீனா உள்ளிட்ட நாடுகளின் முன்னணி நிறுவனங்களின் இணைய சேவைகள் மீது இந்த இணையவழித் தாக்குதல்  மேற்கொள்ளப்பட்டுள்ளதாக செய்திகள் தெரிவிக்கின்றன.

இவையெல்லாம் தனித்தனி தாக்குதல்களா அல்லது ஒன்றோடொன்று தொடர்புடையவையா என்பது தெளிவாகவில்லை.

பிரித்தானியாவின் தேசிய மருத்துவ சேவையின் இணைய கட்டமைப்பின் மீது மிகப்பெரிய தாக்குதல் நடத்தப்பட்டு உள்ளது. இதனால் பிரித்தானியாவின் முன்னணி மருத்துவமனைகளின் இணையக்கட்டமைப்பில் பாரிய தாக்கம் ஏற்பட்டுள்ளதாகவும் நோயாளிகளுக்கான சேவைகள் பாதிக்கப்பட்டுள்ளதாகவும் அறிவிக்கப்பட்டுள்ளது.

Ransomware Attack என ஆங்கிலத்தில் அழைக்கப்படும் பிணைத்தொகை கேட்கும் மென்பொருளை பயன்படுத்தி இந்த தாக்குதல் நடத்தப்பட்டிருக்கிறது. இதன் அடிப்படையில் இணைய சேவைகளை மீண்டும் செயற்படுத்த செய்யவேண்டுமானால் பணம் தரவேண்டும் என்று குறித்த மென்பொருள் கேட்கும்.

பிரிட்டனின் சில மருத்துவ மையங்கள் மற்றும் மருத்துவமனைகளின் இணைய கட்டமைப்பு முழுமையாக செயலிழந்துபோனதால் பல இடங்களில் நோயாளிகள் அவசரகால சிகிச்சை பிரிவுகளுக்கு அனுப்பப்பட்டனர்.

ஸ்பெய்ன் நாட்டில் பெருமளவான நிறுவனங்களிலும் தாக்குதல் நடத்தப்பட்டதனால் இதேபோல் இணையக்கட்டமைப்பும் பாதிக்கப்பட்டிருப்பதாக அந்நாட்டு அரசாங்கம் தெரிவித்துள்ளமை குறிப்பிடத்தக்கது.