தவறவிடாதீர்கள்..!உடனே பதிவு செய்யுங்கள்

கேப்பாபுலவு, புதுக்குடியிருப்பில் இராணுவத்திடம் தமது நிலங்களை விடுவித்து தருமாறு கோரி மண் மீட்பு போராட்டத்தில் ஈடுபட்டுள்ள மக்களுக்கு ஆதரவு தெரிவித்து பாராளுமன்றத்துக்கு செல்லாது மக்களோடு உணவுதவிர்ப்பு போராட்டத்தில்  வன்னி மாவட்ட பாராளுமன்ற உறுப்பினர்  சிவமோகன் ஈடுபட்டுள்ளார்.

புதுக்குடியிருப்பு புதுமாத்தளன் வீதியில் பொதுமக்களின் காணிகளிலுள்ள இராணுவத்தை வெளியேறுமாறு கோரியும் தொடர் போராட்டத்தில் ஈடுபட்டுள்ள கேப்பாபுலவு மக்களுக்கு ஆதரவு தெரிவித்தும் புதுக்குடியிருப்பில் பொதுமக்கள் முன்னெடுத்துள்ள போராட்டம் இன்று பத்தொன்பதாவது நாளை  எட்டியுள்ள அதேவேளை சுழற்சி முறையிலான உணவு தவிர்ப்பு போராட்டம் இன்று எட்டாவது நாளாக இடம்பெறுகிறது.

இந்நிலையில் முல்லைத்தீவு மாவட்டத்தில் கேப்பாபுலவு மற்றும் புதுக்குடியிருப்பில் இராணுவத்திடம் தமது நிலங்களை விடுவித்து தருமாறு கோரி மண் மீட்பு போராட்டத்தில் ஈடுபட்டுள்ள மக்களுக்கு ஆதரவு தெரிவித்து இன்று பாராளுமன்றத்துக்கு செல்லாது மக்களோடு உணவுதவிர்ப்பு போராட்டத்தில்  வன்னி மாவட்ட பாராளுமன்ற உறுப்பினர்  வைத்திய கலாநிதி  சிவமோகன் ஈடுபட்டுள்ளார்.

இந்த போராட்டம் கடந்த மூன்றாம் திகதி முதல் புதுக்குடியிருப்பு பிரதேச செயலகத்திற்கு முன்னால்  இடம்பெற்று வருகின்றது. முல்லைத்தீவு மாவட்டம் புதுக்குடியிருப்பு பிரதேச செயலாளர் பிரிவிற்குட்பட்ட 49 பொதுமக்களுக்கு சொந்தமான 19 ஏக்கர் காணிகளை விடுவிக்குமாறு தெரிவித்தே, பொதுமக்கள் போராட்டத்தில் ஈடுபடுபட்டுள்ளனர்.

எனினும் கடந்த 9 ஆம் திகதி போராட்டத்தில் ஈடுபட்டுள்ள சிலர்  பிரதமர் ரணில் விக்ரமசிங்கவை சந்தித்து கலந்துரையாடிய போதும் இதுவரை எந்தவொரு தீர்வும் முன்வைக்கப்படவில்லை என மக்கள் தெரிவிக்கின்றனர்.

இதுதொடர்பாக பாராளுமன்ற உறுப்பினர் சிவமோகன்  கருத்து தெரிவிக்கையில்,

பலதடவைகள் பாராளுமன்றில் கதைத்தும் காணிப்பிரச்சினை தொடர்பாக  எந்த பதிலும் கிடைக்கவில்லை எனவே பாராளுமன்றிற்கு சென்று எந்த பலனுமில்லை. அதானால் அந்த பாராளுமன்றுக்கு சென்று எதுவும் ஆகப்போவதில்லை அதனால் நான் இன்று  விடுவிப்புக்காக உண்ணாவிரதப் போராட்டத்தில் ஈடுபட்டுள்ளேன் என்றார்.