கைது செய்யப்பட்ட முன்னாள் போராளிகள் 5 பேரும்  பாராளுமன்ற உறுப்பினர் எம்.ஏ.சுமந்திரனை படுகொலை செய்வதற்கு முயன்றாத பொலிஸார் நீதிமன்றில் கூறவில்லை என வடமாகாண முதலமைச்சர் சி.வி.விக்னேஸ்வரன் தெரிவித்தார்.

பாராளுமன்ற உறுப்பினர் ஒருவரை  படுகொலை செய்ய, முன்னாள் போராளிகள் சிலர் சதி திட்டம் தீட்டியதாக செய்திகள் வெளியாகி வரும் நிலையில் இந்த விடயம் தொடர்பாக முதலமைச்சரிடம் ஊடகவியலாளர்கள் எழுப்பிய கேள்வி ஒன்றுக்கு பதிலளிக்கும்போதே அவர் மேற்கண்டவாறு கூறியுள்ளார்.

மேற்படி விடயம் தொடர்பாக அவர் மேலும் தெரிவிக்கையில்,

பாராளுமன்ற உறுப்பினரை படுகொலை செய்வதற்கு முயன்றதாக அண்மையில் கைது செய்யப்பட்ட முன்னாள் போராளிகள் 5 பேரும் திட்டம் தீட்டினார்கள் என பொலிஸார் நீதிமன்றில் கூறவில்லை. அவர்கள் மீது போதைப்பொருட்களை வைத்திருந்தார்கள், வேறு ஏதோ வைத்திருந்தார்கள் என்றே குற்றச்சாட்டு சுமத்தப்பட்டுள்ளது.

அந்தவகையில் இந்த விடயத்தில்  எந்தளவு உண்மையுள்ளது என எண்ணத்தோன்றுகின்றது . இதற்கு முன்பும் விபூசிகாவின் தாயாரை கைது செய்யும்போதும் கூறினர் ஆனால் யாரும் கைது செய்யப்படவில்லையே எனவே  வடமாகாணத்தில் படையினரை தொடர்ந்தும் நிலை கொள்ள செய்வதற்கான முயற்சியா எனவும் எமக்கு சந்தேகம் உள்ளது என்றார்.