பிரேஸில் - குரோஷியா போட்டியுடன் உலகக் கிண்ண கால் இறுதிச் சுற்று இன்று ஆரம்பம்

Published By: Digital Desk 5

09 Dec, 2022 | 10:18 AM
image

(நெவில் அன்தனி)

எதிர்பாராத பல முடிவுகளுடன் பரபரப்பை ஏற்படுத்திய குழு நிலை முதல் சுற்று மற்றும் இரண்டாம் சுற்று நொக்-அவுட் போட்டிகளைத் தொடர்ந்து கத்தார் 2022 பீபா உலகக் கிண்ணப் போட்டியில் 8 அணிகள் மீதமுள்ள நிலையில் கால் இறுதிப் போட்டிகள் இன்று வெள்ளிக்கிழமையும் (09) நாளை சனிக்கிழமையும் (10) நடைபெறவுள்ளன.

இந்த 8 அணிகளும் எதிர்வரும் டிசம்பர் மாதம் 18ஆம் திகதி உலகக் கிண்ணத்தை சுவீகரிப்பதைக் குறியாகக் கொண்டு கால் இறுதிப் போட்டிகளில் வெற்றிகொள்ள பிரயத்தனம் எடுக்கவுள்ளதால் இந்தப் போட்டிகள் முன்னரைவிட பரபரப்பையும் விறுவிறுப்பையும் தோற்றுவிக்கும் என எதிர்பார்க்கப்படுகிறது.

இந் நிலையில் 5 தடவைகள் உலக சம்பியனா பிரேஸிலை குரோஷியாவும் 2 தடவைகள் உலக சம்பியனான ஆர்ஜன்டீனைவை நெதர்லாந்தும் இன்று நடைபெறவுள்ள முதல் இரண்டு கால் இறுதிப் போட்டிகளில் எதிர்த்தாடவுள்ளன.

பிரேஸிலுக்கும் குரோஷியாவுக்கும் இடையிலான முதலாவது கால் இறுதிப் போட்டி அல் ரய்யான், எட்யூகேஷன் சிட்டி விளையாட்டரங்கில் இன்று இரவு 8.30 மணிக்கு ஆரம்பமாகவுள்ளது.

குரோஷியாயாவுடன் இதுவரை விளையாடிய நான்கு சந்தர்ப்பங்களிலும் பிரேஸில் வெற்றிபெற்றுள்ளது. இந்த இரண்டு அணிகளும் உலகக் கிண்ண முதல்  சுற்றில் சந்தித்த 2 சந்தர்ப்பங்களிலும் பிரேஸில் வெற்றிபெற்றிருந்தது. (2006இல் 1 - 0, 2014இல் 3 - 1).

தென் கொரியாவிலும் ஜப்பானிலும் 2002இல் கூட்டாக நடத்தப்பட்ட உலக கிண்ண இறுதிப் போட்டியில் ஜேர்மனியை 2 - 0 என வெற்றிகொண்டு தனது 5ஆவது உலக சம்பியன் பட்டத்தை வென்ற பிரேஸில் அதன் பின்னர் தொடர்ச்சயாக 4 அத்தியாங்களில் நொக் - அவுட் சுற்றில் ஐரோப்பிய நாடுகளிடம் தோல்வி அடைந்தது.

அவற்றில் 3 கால் இறுதி தோல்விகள் (பிரான்ஸ் 2006, நெதர்லாந்து 2010, பெல்ஜியம் 2018) அடங்குகின்றன.

ஏற்கனவே குறிப்பிட்டதுபோல் 6ஆவது உலகக் கிண்ணத்திற்கு குறிவைத்துள்ள பிரேஸில், அதற்கு முன்னதாக 9ஆவது தடவையாக அரை இறுதிக்கு முன்னேற முயற்சிக்கவுள்ளது. ஜேர்மனி மாத்திரமே அதிக தடவைகள் (12) அரை இறுதியில் விளையாடியுள்ளது.

முதல் சுற்றில் ஜீ குழுவில் இடம்பெற்ற பிரேஸில், மிகவும் சிரமத்திற்கு மத்தியிலேயே செர்பியா (2 - 0), சுவிட்சர்லாந்து (1 - 0) ஆகிய அணிகளை வெற்றிகொண்டிருந்தது. கடைசிப் போட்டியில் முற்றிலும் எதிர்பாராத விதமாக கெமறூனிடம் உபாதையீடு நேரத்தில் தோல்வி (0 - 1) அடைந்தது.

எனினும் ஏற்கனவே 2ஆம் சுற்றில் விளையாட தகுதிபெற்றிருந்த பிரேஸில், நொக்-அவுட் சுற்றில் தென் கொரியாவை 4 - 1 என மிக இலகுவாக வெற்றிகொண்டு   கால இறுதிக்கு முன்னேறியது.

நேமார், ரிச்சலிசன், வினிசியஸ் ஜூனியர், கெசேமிரோ, ரஃபின்ஹா என பிரேஸில் அணியில் மிகச் சிறந்த வீரர்களை பட்டியலிட்டுக்கொண்டு போகலாம். 

ஆரம்பப் போட்டியில் உபாதைக்குள்ளாகி 2 போட்டிகளை தவறவிட்ட நேமார் 2ஆம் சுற்றில் விளையாடிதுடன் உபாதையிலிருந்து மீண்டுள்ள மற்றொரு பிரதான வீரர் அலெக்ஸ் சண்ட்ரோ இன்றைய போட்டியில் விளையாடுவார் என எதிர்பார்க்கப்படுகிறது.

குரோஷியா

ரஷ்யாவில் 2018இல் நடைபெற்ற உலகக் கிண்ண கால்பந்தாட்டப் போட்டியில் 2ஆம் இடத்தைப் பெற்ற குரோஷியா, இம்முறை முதல் தடவையாக சம்பியானவதற்கு முயற்சிக்கவுள்ளது. எனினும் தென் அமெரிக்கா நாடுகளுடனான அதன் பெறுபேறுகள் திருப்திகரமாக இல்லை.

ஆர்ஜன்டீனாவுக்கு எதிராக 2018இல் 3 - 0 என வெற்றிபெற்ற குரோஷியா அதற்கு முன்னர் 2 தடவைகள் குழுநிலை சுற்றில் பிரேஸிலிடம் தோல்வி அடைந்திருந்தது.

உலகக் கிண்ணம், யூரோ கிண்ணம் ஆகியவற்றில் 2008இலிருந்து குரோஷியா விளையாடிய 8 நொக்-அவுட் போட்டிகளில் 7 போட்டிகள் மேலதிக நேரம் வரை நீடித்தன. 2018இல் 3 போட்டிகள் மேலதிக நேரம் வரை நீடித்ததுடன் அவற்றில் 2இல் பெனல்டி முறையில் (16 அணிகள் சுற்று, கால் இறுதி) வெற்றிபெற்ற குரோஷியா, இந்த வருடம் 16 அணிகள் சுற்றில் மீண்டும் பெனல்டி முறையில் வெற்றிபெற்றது.

1998இலும் 2018இலும் கடைசி 4 அணிகளில் இடம்பெற்ற குரோஷியா இம் முறை மூன்றாவது தடவையாக அரை இறுதிக்கு செல்ல குறிவைத்துள்ளது.

முதல் சுற்றில் எவ் குழுவில் இடம்பெற்ற குரோஷியா ஒரு போட்டியிலும் தோல்வி அடையாத போதிலும் அதன் பெறுபேறுகள் சிறப்பாக அமையவில்லை.

மொரோக்கோவுடனான அதன் ஆரம்பப் போட்டி 0 - 0 என வெற்றிதோல்வியின்றி முடிவடைந்தது. 2ஆவது போட்டியில் கனடாவை 4 - 1 என இலகுவாக வெற்றிகொண்ட குரோஷியா, கடைசிப்  போட்டியை பெல்ஜியத்துடன் (0 - 0) வெற்றிதோல்வியின்றி முடித்துக்கொண்டது.

தொடர்ந்து குரோஷியாவுக்கும் ஜப்பானுக்கும் இடையில் நடைபெற்ற 2ஆம் சுற்று ஆட்டம் மேலதிக நேர முடிவில் 1 - 1 என வெற்றிதோல்வியின்றி முடிவடைந்தது.

அதனைத் தொடர்ந்து   அமுல்படுத்தப்பட்ட பெனல்டி முறையில்  3 - 1 என குரோஷியா வெற்றிபெற்றது. 

கோல்காப்பாளர் டொமினிக் லிவாகோவிச் 1ஆம், 2ஆம், 4ஆம் பெனல்டிகளைத் தடுத்து நிறுத்தி குரோஷியாவுக்கு வெற்றியீட்டிக்கொடுத்து ஹீரோவானார்.

தனது இரண்டாவது உலகக் கிண்ண அத்தியாயத்தில் தொடர்ந்தும் அணித் தலைவராக விளையாடும் லூக்கா மொட்றிச், கோல் காப்பளாளர் டொமினிக் லிவாகோவிச், அண்ட்றெஜ் க்ராமாரிச், மார்க்கோ லிவாஜா, லோவ்ரோ மேஜர், ஐவன் பெரிசிக் ஆகியோர் குரோஷியா அணியில் கவனத்தில்கொள்ளப்பட வேண்டிய வீரர்களாவர்.

முக்கிய செய்திகள்

icon-left
icon-right

தொடர்பான செய்திகள்

news-image

வீராங்கனையை முத்தமிட்ட ஸ்பானிய கால்பந்து சம்மேளன...

2024-03-29 09:43:13
news-image

ரியான் பரக்கின் அதிரடி ராஜஸ்தானை வெற்றிபெறச்...

2024-03-29 00:52:31
news-image

19 வயதின் கீழ் ஆஸி. அணியை...

2024-03-28 20:03:31
news-image

இலங்கை கால்பந்தாட்ட அணி, ஜனாதிபதியை சந்தித்தது

2024-03-28 17:49:42
news-image

எஸ்.எஸ்.சி.யின் 125 வருட கொண்டாட்ட விழா...

2024-03-28 13:22:56
news-image

பங்களாதேஷுடனான 2ஆவது டெஸ்ட்: உபாதைக்குள்ளான ராஜித்தவுக்குப்...

2024-03-28 13:22:16
news-image

19இன் கீழ் மகளிர் மும்முனை கிரிக்கெட்...

2024-03-28 00:56:33
news-image

சாதனைகள் படைக்கப்பட்ட ஐபிஎல் போட்டியில் மும்பையை...

2024-03-28 00:04:56
news-image

சில்ஹெட் டெஸ்டில் தலா 2 சதங்கள்...

2024-03-27 22:22:22
news-image

இலங்கையில் மகளிர் ரி20 ஆசிய கிண்ண...

2024-03-27 22:09:33
news-image

குஜராத்தை வீழ்த்தி இரண்டாவது நேரடி வெற்றியை...

2024-03-27 01:34:06
news-image

ஐ.பி.எல் 2024 : குஜராத் டைட்டன்ஸ்...

2024-03-26 23:43:35