தவறவிடாதீர்கள்..!உடனே பதிவு செய்யுங்கள்

பிரித்தானியாவுக்குட்பட்ட இங்கிலாந்து மற்றும் வேல்ஸில் கிறிஸ்தவர்கள் சிறுபான்மையினர் ஆகியுள்ளனர் என்பது தெரியவந்துள்ளது. 

நேற்று செவ்வாய்க்கிழமை வெளியிடப்பட்ட புதிய குடிசன மதிப்பீட்டு விபரங்களின்படி, இங்கிலாந்து, வேல்ஸில் 50 சதவீதத்துக்கு குறைவானோரே தம்மை கிறிஸ்தவர் என அடையாளப்படுத்தியுள்ளனர். 

பல்கலாசாரத் தன்மையுடைய பிரிட்டனில் மதசார்பற்ற நிலையை நோக்கிய திசையில் இது ஒரு மைல் கல்லாகக் கருதப்படுகிறது.

2021 ஆம் ஆண்டு நடத்தப்பட்ட இக்குடிசன மதிப்பீட்டு விபரங்களே தற்போது வெளியாகியுள்ளன.

இதற்குமுன் 2011 ஆம் ஆண்டில் 59.3 சதவீதமானோர்  தம்மை கிறிஸ்தவர் என அடையாளப்படுத்தியிருந்தனர்.

ஆனால் 2021 ஆம் ஆண்டின் புதிய சனத்தொகை கணக்கெடுப்பில்  46.2 சதவீதமானோரே தம்மை கிறிஸ்தவர் என அடையாளப்படுத்தியுள்ளனர். 

பிரிட்டனில் இந்து பிரதமராக ரிஷி சுனாக் பதவியேற்று சுமார் ஒரு மாதம் கடந்த நிலையில் இவ்விபரங்கள் வெளியாகியுள்ளனமை குறிப்பிடத்தக்கது.

இது தொடர்பாக தேசிய புள்ளிவிபரவியல் அலுவலகம் தெரிவிக்கையில், முஸ்லிம் சனத்தொகையில் திடீர் அதிகரிப்பை இவ்விபரங்கள் வெளிப்படுத்துகின்றன. ஆனால், மதம் தொடர்பான கேள்விக்கு கிறிஸ்தவத்துக்கு அடுத்ததாக, 'மதம் இல்லை' என்பதே இரண்டாவது ஆகக்கூடுதலாக கிடைத்த பதிலாகும் எனத் தெரிவித்துள்ளது.

யோர்க் பேராயர் ஸ்டீபன் கோட்ரெல் இது தொடர்பாக கருத்துத் தெரிவிக்கையில், கிறிஸ்தவர்களின் விகிதாசாரம் குறைந்து வருவதில் பெரும் ஆச்சரியம் எதுவுமில்லை எனக் கூறியுள்ளார்.

அதேவேளை, வாழ்க்கைச் செலவு அதிகரிப்புப் பிரச்சினை மற்றும் ஐரோப்பாவில் யுத்தம் ஆகியவற்றுக்கு முகம் கொடுக்கும் மக்களுக்கு இன்னும் ஆன்மிக வாழ்வாதாரங்கள் தேவைப்படுகின்றன எனத் தெரிவித்துள்ளார்.