தவறவிடாதீர்கள்..!உடனே பதிவு செய்யுங்கள்

உலக கோப்பை கால்பந்து போட்டியில் வெற்றி பெற்ற சவூதி அரேபியா வெற்றியைக் கொண்டாடும் விதமாக இன்று (நவ.23) ஒருநாள் தேசிய விடுமுறை அறிவித்து சவூதி மன்னர் உத்தரவிட்டுள்ளார்.

உலகின் மிகப்பெரிய விளையாட்டு திருவிழாக்களில் ஒன்றான உலக கோப்பை கால்பந்து போட்டி 1930 ஆம் ஆண்டு முதல் 4 ஆண்டுகளுக்கு ஒருமுறை நடத்தப்பட்டு வருகிறது.  

இந்த நிலையில் உலகம் முழுவதும் உள்ள கால்பந்து ரசிகர்கள் ஆர்வத்துடன் காத்திருக்கும் 22ஆவது உலக கோப்பை கால்பந்து போட்டி கத்தாரில் நடைபெற்று வருகிறது. இந்தத்தொடரில் நேற்று (நவ. 22) நடைபெற்ற ஆட்டத்தில் அர்ஜென்டினா, சவூதி அரேபியா அணிகள் மோதின.

ஆட்டம் ஆரம்பித்தது முதல் ஆதிக்கம் செலுத்திய அர்ஜென்டினா அணியினர் மிக சிறப்பாக விளையாடி கோல் வாய்ப்புகளை உருவாக்கினர் . ஆட்டத்தின் 10ஆவது நிமிடத்தில் அர்ஜென்டினா அணிக்கு பெனால்டி கிடைத்தது. இதனை சரியாக பயன்படுத்திய அணியின் கேப்டன் மெஸ்ஸி கோல் அடித்து அசத்தினார்.

இதனால் முதல் பாதி முடிவில் 1-0 என அர்ஜென்டினா முன்னிலை வகித்தது. தொடர்ந்து நடைபெற்ற 2ஆவது பாதி ஆட்டத்தில் ஆதிக்கம் செலித்திய சவூதி  அரேபியா அணியின் சலே அல்ஷெரி 48ஆவது நிமிடத்திலும், சலேம் அல்தாவசாரி 53ஆவது நிமிடத்திலும் கோல் அடித்தனர். இதற்கு பின்னர் பதிலடி கொடுக்க அர்ஜென்டினா அணி போராடியும் கோல் அடிக்க முடியவில்லை. இதனால் முடிவில் 2-1 என சவூதி  அரேபியா அணி வெற்றி பெற்றது.

இந்நிலையில், சவூதி அரேபியா வெற்றியைக் கொண்டாடும் விதமாக நாடு முழுதும் இன்று ஒருநாள் தேசிய விடுமுறை அறிவித்து சவூதி  மன்னர் உத்தரவிட்டுள்ளார்.