தவறவிடாதீர்கள்..!உடனே பதிவு செய்யுங்கள்

(என்.வீ.ஏ.)

செல்ஸ்போர்ட் விளையாட்டரங்கில் ஞாயிற்றுக்கிழமை (21) ஆரம்பமான 19 வயதுக்குட்பட்ட இலங்கை - இங்கிலாந்து அணிகளுக்கு இடையிலான முதலாவது இளையோர் (4 நாள்) டெஸ்ட் கிரிக்கெட் போட்டியில் இங்கிலாந்து   இளையோர்   அணி   பலம் வாய்ந்த நிலையில் இருக்கிறது.

அப் போட்டியில் முதலில் துடுப்பெடுத்தாடத் தீர்மானித்த 19 வயதுக்குட்பட்ட இங்கிலாந்து, அதன் முதல் இன்னிங்ஸில் சகல விக்கெட்களையும் இழந்து 387 ஓட்டங்களைக் குவித்தது.

19 வயதான ஜோர்ஜ் பெல் குவித்த சதம், 17 வயதான ரொஸ் வைட்பீல்ட் மற்றும் 18 வயதான பெர்ட்டி போர்மன் ஆகியோர் பெற்ற அரைச் சதங்கள் இங்கிலாந்து இளையோர் அணியை பலப்படுத்தின.

ரொஸ் வைட்பீல்ட், ஜோர்ஜ் பெல் ஆகிய இருவரும் மிகத் திறமையாகத் துடுப்பெடுத்தாடி 3 ஆவது விக்கெட்டில் 185 ஓட்டங்களைப் பகிர்ந்து மொத்த எண்ணிக்கையை 249 ஓட்டங்களாக உயர்த்தினர்.

ஜோர்ஜ் பெல் 107 ஓட்டங்களையும் ரொஸ் வைட்பீல்ட் 86 ஓட்டங்களையும் பெற்றனர்.

எவ்வாறாயினும் மொத்த எண்ணிக்கை 268 ஓட்டங்களாக இருந்தபோது 3 விக்கெட்களை இங்கிலாந்து இளையோர் அணி இழந்தது.

பின்வரிசையில் பேர்ட்டி போர்மன் ஆட்டமிழக்கமால் 58 ஓட்டங்களைப் பெற்றார்.

இலங்கை பந்துவீச்சில் துவிந்து  ரணதுங்க 100 ஓட்டங்களுக்கு 4 விக்கெட்களையும் வனுஜ சஹான் 56 ஓட்டங்களுக்கு 2 விக்கெட்களையும் துலாஜ் சமுதித்த 105 ஓட்டங்களுக்கு 2 விக்கெட்களையும் கைப்பற்றினர்.

பதிலுக்கு முதல் இன்னிங்ஸில் துடுப்பெடுத்தாடும் இலங்கை இளையோர் அணி முதலாம் நாள் ஆட்டநேர முடிவில் விக்கெட் இழப்பின்றி 15 ஓட்டங்களைப் பெற்றிருந்தது.

அசித்த வன்னிநாயக்க 13 ஓட்டங்களுடனும் சதிஷ ராஜபக்ஷ 11 ஓட்டங்களுடனும் ஆட்டமிழக்காதிருந்தனர்.