தவறவிடாதீர்கள்..!உடனே பதிவு செய்யுங்கள்

இந்திய வம்சாவளியான ரிஷி சுனக் பிரிட்டனில் புதிய பிரதமருக்கான  முதல் சுற்றை தேர்தலை தொடர்ந்து இரண்டாம் சுற்றிலும் 101 வாக்குகள் பெற்று வெற்றியாளராக முன்னிலையில் உள்ளார்.

பிரிட்டன் பிரதமர் போரிஸ் ஜோன்சன் பிரதமர் பதவியிலிருந்து விலகுவதாகவும், புதிய பிரதமர் தெரிவுசெய்யப்படும் வரை இடைக்கால பிரதமராகப் பதவியில் நீடிப்பதாகவும் அறிவித்திருந்தார். 

அதிலிருந்து பிரிட்டன் அரசியல் களத்தில் பரபரப்பு உச்சத்தை எட்டியுள்ளது. இந்த நிலையில், கன்சர்வேடிவ் கட்சித் தலைவர் மற்றும் பிரிட்டன் பிரதமருக்கான தேர்தல் நடைபெற்றுவருகிறது.

இந்த தேர்தலில் இந்திய வம்சாவளியான ரிஷி சுனக் முதல் சுற்று வாக்கெடுப்பில் 88 வாக்குகள் பெற்று முன்னிலையில் இருந்தார். அதைத் தொடர்ந்து இரண்டாம் கட்டத் தேர்தல் நேற்று நடைபெற்றது. அதிலும் ரிஷி சுனக் தொடர்ந்து 101 வாக்குகள் பெற்று வெற்றியாளராக முன்னிலையில் தொடர்கிறார். 

அவரைத் தொடர்ந்து, வர்த்தக அமைச்சர் பென்னி மோர்டான்ட் 83 வாக்குகளும், வெளியுறவுச் செயலர் லிஸ் ட்ரஸ் 64 வாக்குகளும், முன்னாள் அமைச்சர் கெமி படேனோக் 49 வாக்குகளும் பெற்றுள்ளனர்.

இந்நிலையில், ரிஷி சுனக் டுவிட்டர் பக்கத்தில், தனது ஆதரவாளர்களுக்கு நன்றி தெரிவித்து, ``என்னிடம் உள்ள அனைத்தையும் நம் தேசத்திற்கு வழங்க தயாராக உள்ளேன். நாம் ஒன்றாக நமது நம்பிக்கையை மீட்டெடுக்கலாம், நமது பொருளாதாரத்தை மீண்டும் கட்டியெழுப்பி நாட்டை மீண்டும் ஒன்றிணைக்கலாம்" எனப் பதிவிட்டுள்ளார்.

இந்தத் தேர்தல் களம் அடுத்த வார இறுதிக்குள் இரண்டு வேட்பாளர்கள் என்றளவில் இறுதிசெய்யப்படும் என்று எதிர்பார்க்கப்படுகிறது, பின்னர் 1,60,000 டோரி உறுப்பினர்கள் அடுத்த கட்சித் தலைவர் மற்றும் பிரதமராக எந்த வேட்பாளராக வர வேண்டும் என்று முடிவுசெய்வார்கள். இந்தத் தேர்தல் முடிவுகள் செப்டம்பர் 5ஆம் திகதி அறிவிக்கப்படும் என தெரிவிக்கப்பட்டிருக்கிறது.