தவறவிடாதீர்கள்..!உடனே பதிவு செய்யுங்கள்

புதுமுக நடிகர் ஜெய் பாலா கதையின் நாயகனாக முதன்மையான கதாபாத்திரத்தில் நடித்திருக்கும் 'கனல்' திரைப்படத்தின் ஓடியோ வெளியிடப்பட்டது. இதனை தமிழ் திரை உலகின் மூத்த நடிகர்களுள் ஒருவரான டத்தோ ஸ்ரீ ராதா ரவி வெளியிட்டார்.

அறிமுக இயக்குநர் சமய முரளி இயக்கத்தில் தயாராகி இருக்கும் முதல் திரைப்படம் 'கனல்'. இதில் ஜெய் பாலா கதையின் நாயகனாக நடிக்க, அவருக்கு ஜோடியாக நடிகை காவ்யா பெல்லு நடித்திருக்கிறார். இவர்களுடன் நடிகர்கள் ஜான் விஜய், சுவாதி கிருஷ்ணன், நடன இயக்குநர் ஸ்ரீதர் உள்ளிட்ட பலர் நடித்திருக்கிறார்கள்.

பாஸ்கர் ஒளிப்பதிவு செய்திருக்கும் இந்த திரைப்படத்திற்கு தென்மா மற்றும் சதீஷ் சக்கரவர்த்தி ஆகியோர் இணைந்து இசையமைத்திருக்கிறார்கள்.

விளிம்பு நிலை மக்களின் வாழ்வியலை மையப்படுத்திய இந்தத் திரைப்படத்தை தி நைட்டிங்கேல் புரொடக்ஷன்ஸ் என்ற பட நிறுவனம் சார்பில் நடிகர் ஜெய் பாலா தயாரித்திருக்கிறார்.

படத்தைப் பற்றி இயக்குநர் பேசுகையில்,

'' அடித்தட்டு மக்களின் வாழ்வியலை மையப்படுத்திய இந்த திரைப்படம் அவர்களிடத்தில் நம்பிக்கை ஏற்படுத்தும் அளவிற்கு திரைக்கதை அமைக்கப்பட்டிருக்கிறது. நடன இயக்குநர் ஸ்ரீதர் சென்னை பற்றிய கானா பாடலுக்கு நடனம் அமைத்து நடித்திருக்கிறார். இது பார்வையாளர்களை கவரும் என நம்புகிறேன். '' என்றார்.

படத்தின் இசையை வெளியிட்டு டத்தோ ஸ்ரீ ராதா ரவி பேசுகையில், '' அடித்தட்டு மக்களின் பிரச்சனையை இயக்குநர் திரைப்படமாக உருவாக்கி இருப்பதால்.. அவருடைய இந்த சிந்தனைக்கு இந்தப் படம் வெற்றிப்படமாக அமையும். திரைப்படத்துறையில் பணியாற்றும் அனைவரும் சினிமாவை நன்றாக தெரிந்து வைத்துக்கொள்ளுங்கள். அதே தருணத்தில் ஒற்றுமையாக இருப்பது முக்கியம்.'' என்றார்.