தவறவிடாதீர்கள்..!உடனே பதிவு செய்யுங்கள்

(எம்.மனோசித்ரா)

நாடு தற்போது எதிர்கொண்டுள்ள நெருக்கடிகள் தொடர்பில் கொழும்பிலுள்ள இராஜதந்திரிகளுக்கு தெளிவுபடுத்தியுள்ள வெளிநாட்டலுவல்கள் அமைச்சர் பேராசிரியர் ஜீ.எல்.பீரிஸ் , அரசியலமைப்பின் 21 ஆவது திருத்தம் தொடர்பிலும் , அதிலுள்ள முக்கிய அம்சங்கள் தொடர்பிலும் விளக்கமளித்துள்ளார்.

கொழும்பை தளமாகக் கொண்ட வெளிநாட்டு இராஜதந்திரிகளுடன் வியாழக்கிழமை (2) இடம்பெற்ற விசேட சந்திப்பின் போதே இவ்விடயங்கள் தொடர்பில் அவதானம் செலுத்தப்பட்டது.

இதன் போது தொடர்ந்தும் கருத்து வெளியிட்ட வெளிநாட்டலுவல்கள் அமைச்சர் பேராசிரியர் ஜீ.எல்.பீரிஸ் , இலங்கையில் தற்போது காணப்படும் நிலைமை மற்றும் எரிபொருள், எரிவாயு, அத்தியாவசிய மருந்துப் பொருட்கள் மற்றும் மின்வெட்டு போன்ற அழுத்தமான பிரச்சினைகளை உள்ளடக்கிய அரசாங்கம் எதிர்கொள்ளும் சவால்களை சுட்டிக் காட்டினார்.

இது தொடர்பான நிலைமையை நிவர்த்தி செய்வதற்கு அரசாங்கம் முனனெடுத்த நடவடிக்கைகளை விரிவாக எடுத்துரைத்த அமைச்சர், தேவைப்படும் நேரத்தில் தமது முழுமையான உதவிகளை வழங்குமாறு தூதுவர்களை கேட்டுக் கொண்டார். அரசியலமைப்பின் 21 ஆவது திருத்தம் தொடர்பிலும் , அதிலுள்ள முக்கிய அம்சங்களையும் அமைச்சர் தெளிவுபடுத்தினார்.

இராஜதந்திர உறுப்பினர்களின் பங்கேற்பிற்காக நன்றி தெரிவித்த அமைச்சர் பீரிஸ், இலங்கையின் அண்மைக்கால வரலாற்றில் குறிப்பாக சவாலான ஒரு கட்டத்தில் தமது ஆதரவையும் நல்லெண்ணத்தையும் வழங்குமாறு தூதுவர்களைக் கேட்டுக்கொண்டார்.

மத்திய வங்கியின் ஆளுநர் கலாநிதி நந்தலால் வீரசிங்க மற்றும் நிதி அமைச்சின் செயலாளர் மஹிந்த சிறிவர்தன ஆகியோர் சுருக்கமான விளக்கங்களை முன்வைத்து கேள்விகளுக்கு பதிலளித்தனர். இந்த மாநாட்டில் வெளிநாட்டு அலுவல்கள் அமைச்சின் செயலாளர் அருணி விஜேவர்தனவும்  இணைந்திருந்தார்.