தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

துபாய் சர்வதேச விளையாட்டரங்கில் நடைபெற்ற அங்குரார்ப்பண  ஃபெயார்ப்ரேக்  அழைப்பு மகளிர் இருபதுக்கு 20 கிரிக்கெட் சுற்றுப்போட்டியில் அதிக ஓட்டங்களை குவித்த வீராங்கனை என்ற சாதனையை இலங்கை அணித் தலைவி சமரி அத்தபத்து நிலைநாட்டினார்.

6 அணிகள் பங்குபற்றிய இந்த சுற்றுப் போட்டியில் பெல்கன்ஸ் அணியில்  இடம்பெற்ற  சமரி அத்தபத்து,  7 இன்னிங்ஸ்களில் துடுப்பெடுத்தாடி  மொத்தமாக 313 ஓட்டங்களைக் குவித்தார்.

ஃபெயார்ப்ரேக் சுற்றுப் போட்டியில் சதம் குவித்த முதலாவது வீராங்கனை என்ற சாதனையை நிலைநாட்டியதுடன் ஆட்டநாயகி விருதை வென்ற முதலாவது வீராங்கனை என்ற பெருமையையும் பெற்றார்.

ஒரு சதம், ஒரு அரைச் சதத்துடன் 32.16 என்ற துடுப்பாட்ட சராசரியைக் கொண்டிருந்த அத்தபத்துவின் ஸ்ட்ரைக் ரேட் 139.11 ஆகும்.

இரண்டு போட்டிகளில் போட்டிகளில் 100க்கும் மேற்பட்ட ஓட்டங்களைக் கொண்ட ஆரம்ப விக்கெட் இணைப்பாட்டங்களிலும் சமரி அத்தபத்து பங்காற்றியிருந்தார். அத்துடன் பந்துவீச்சிலும் 4 விக்கெட்களை வீழ்த்தியிருந்தார்.

இங்கிலாந்தின் இடதுகை சுழல்பந்துவிச்சாளர் சொபி எக்லஸ்டோன் 7 போட்டிகளில் 17 விக்கெட்களை மொத்தமாக வீழ்த்தி பந்துவீச்சில் முதலிடம் வகித்தார். ஸ்பிரிட் அணிக்காக எக்லஸ்டோன் விளையாடியிருந்தார்.

துரதிர்ஷ்டவசமாக இறுதி ஆட்டத்தில் சமரி அத்தபத்துவினால் பிரகாசிக்க  முடியாமல் போனதுடன் அவரது அணி தோல்வி அடைந்து 2ஆம் இடத்தையே பெற்றது.

அப் போட்டியில் பெல்கன்ஸ் 20 ஓவர்களில் 4 விக்கெட்களை இழந்து 151 ஓட்டங்களைப் பெற்றது.

பதிலுக்கு துடுப்பெடுத்தாடிய டோர்னாடஸ் 19.1 ஓவர்களில் 2 விக்கெட்களை இழந்து 152 ஓட்டங்களைப் பெற்று 8 விக்கெட்களால் வெற்றியீட்டி சம்பியனானது.