தவறவிடாதீர்கள்..!உடனே பதிவு செய்யுங்கள்

(என்.வீ.ஏ.)

லக்னோ சுப்பர் ஜயன்ட்ஸுக்கு எதிராக புனே மகாராஷ்டிரா கிரிக்கெட் சங்க மைதானத்தில் செவ்வாய்க்கிழமை (10) நடைபெற்ற போட்டியில் 62 ஓட்டங்களால் வெற்றியீட்டிய குஜராத் டைட்டன்ஸ், முதலாவது அணியாக ஐபிஎல் ப்ளே ஓவ் சுற்றில் விளையாட தகுதி பெற்றது.

ஷுப்மான் கில் குவித்த ஆட்டமிழக்காத அரைச் சதமும் ராஷித் கானின் 4 விக்கெட் குவியலும் குஜராத்தின் வெற்றியை உறுதிசெய்தன.

துடுப்பாட்டக்காரர்கள் சிரமத்தை எதிர்கொண்ட அப் போட்டியில் 145 ஓட்டங்களை வெற்றி இலக்காகக் கொண்டு பதிலுக்கு துடுப்பெடுத்தாடிய லக்னோ சுப்பர் ஜயன்ட்ஸ் 13.5 ஓவர்களில் சகல விக்கெட்களையும் இழநது 82 ஓட்டங்களுக்கு சுருண்டது.

லக்னோ சார்பாக மூன்று வீரர்கள் மாத்திரமே இரட்டை இலக்க எண்ணிக்கைகளைப் பெற்றதுடன் 11ஆம் இலக்க வீரர் ஆவேஷ் கான் 2ஆவது அதிகப்பட்ச எண்ணிக்கையாக 12 ஓட்டங்களைப் பெற்றார்.

முன்வரிசையில் தீப்பக் ஹூடா 27 ஓட்டங்களையும் குவின்டன் டி கொக் 11 ஓட்டங்களையும் பெற்றனர்.

குஜராத் பந்துவீச்சில் ராஷித் கான் 24 ஓட்டங்களுக்கு 4 விக்கெட்களையும் ரவிஸ்ரீனிவாசன் சாய் கிஷோர் 7 ஓட்டங்களுக்கு 2 விக்கெட்களையும் யாஷ் தயாள் 24 ஓட்டங்களுக்கு 2 விக்கெட்களையும் கைப்பற்றினர்.

முன்னதாக இப் போட்டியில் முதலில் துடுப்பெடுத்தாடத் தீர்மானித்த குஜராத் டைட்டன்ஸ் 20 ஓவர்களில் 4 விக்கெட்களை இழந்து 144 ஓட்டங்களைப் பெற்றது.

ரிதிமான் சஹா (5), மெத்யூ வேட் (10), அணித் தலைவர் ஹார்திக் பாண்டியா (11) ஆகியோர் குறைந்த ஓட்டங்களுடன் ஆட்டமிழக்க குஜராத் டைட்டன்ஸின் மொத்த எண்ணிக்கை  9.1 ஓவர்களில்   51 ஓட்டங்களாக இருந்தது.

ஆனால், எஞ்சிய 65 பந்துகளில் 93 ஓட்டங்களைப் பெற்ற குஜராத் டைட்டன்ஸ் ஓரளவு கௌரவமான நிலையை அடைந்தது.

ஷுப்மான் கில் பொறுமையுடன் துடுப்பெடுத்தாடி ஆட்டமிழக்காமல் 63 ஓட்டங்ளைப் பெற்றார்.

குஜராத் டைட்டன்ஸ் இன்னிங்ஸில் ஒரே ஒரு சிக்ஸை அடித்த டேவிட் மில்லர் 26 ஓட்டங்களையும் ராகுல் தெவாட்டியா ஆட்டமிழக்காமல் 22 ஓட்டங்களையும் பெற்றனர்.

4ஆவது விக்கெட்டில் டேவிட் மில்லருடன் 52  ஓட்டங்களைப் பகிர்ந்த கில், பிரிக்கப்படாத 5ஆவது விக்கெட்டில் மேலும் 41 ஓட்டங்களைப் பகிர்ந்தார்.

பந்துவீச்சில் ஆவேஷ் கான் 26 ஓட்டங்களுக்கு 2 விக்கெட்களைக் கைப்பற்றினார்.