தவறவிடாதீர்கள்..!உடனே பதிவு செய்யுங்கள்

(என்.வீ.ஏ.)

துபாயில் அடுத்த மாதம் நடைபெறவுள்ள பெயார்ப்ரேக் அழைப்பு 2022 (FairBreak Invitational 2022)   இருபதுக்கு 20 கிரிக்கெட் சுற்றுப் போட்டியில் இலங்கை மகளிர் கிரிக்கெட் அணித் தலைவி சமரி அத்தப்பத்து, இடதுகை வேகப்பந்துவீச்சாளர் உதேஷிகா ப்ரபோதனி ஆகிய இருவரும் விளையாட ஒப்பந்தமாகியள்ளனர்.

சுஸி பேட்ஸ் (நியூஸிலாந்து), டெனில் வைட் (இங்கிலாந்து), மாரிஸ்ஆன் கெப் (தென் ஆபிரிக்கா) பொன்ற பிரபல வீராங்கனைகளுடன் பெல்கன்ஸ் அணிக்காக சமரி அத்தப்பத்து விளையாடவுள்ளார்.

சமரி அத்தப்பத்து 89 மகளிர் சர்வதேச இருபது 20 போட்டிகளில் விளையாடியுள்ளதுடன் அவுஸ்திரேலியா, இங்கிலாந்து, இந்தியா ஆகிய நாடுகளில் தொழில்சார் மகளிர் இருபது 20 கிரிக்கெட் பொட்டிகளில் விளையாடிய அனுபசாலி ஆவார்.

உதேஷிகா ப்ரபோதனி இந்த சுற்றுப் போட்டியில் வொரியர்ஸ் அணிக்காக விளையாடவுள்ளார். இத்தகைய தொழில்சார் கிரிக்கெட் போட்டியில் ப்ரபோதனி விளையாடுவது இதுவே முதல் தடவையாகும்.

36 வயது நிரம்பிய ப்ரபோதனி 75 சர்வதேச இருபது 20 கிரிக்கெட் போட்டிகளில் விளையாடியுள்ளார்.

ஐசிசியின் அங்கீகாரம் பெற்ற மகளிர் கிரிக்கெட் போட்டி

பெயார்ப்ரேக் இன்விட்டேஷனல் 2022 (அழைப்பு கிரிக்கெட்) மகளிர் இருபது 20 கிரிக்கெட் போட்டியானது சர்வதேச கிரிக்கெட் பேரவையினால் அங்கீகரிக்கப்பட்ட ஒன்றாகும்.

ஆறு அணிகள் பங்குபற்றும் இந்த சுற்றுப் போட்டி துபாயில் தொழிலாளர் தினத்தன்று ஆரம்பமாகி மே மாதம் 15ஆம் திகதி இறுதிப் போட்டியுடன் நிறைவடையும்.

மகளிர் கிரிக்கெட் வரலாற்றில் முதல் தடவையாக தனியார்  நிறுவனம்  அனுசரணை வழங்கும் இந்த சுற்றுப் போட்டியில் உலகம் முழுவதும் இருந்து வீராங்கனைகள் பங்குபற்றவுள்ளனர்.

ஜென்கோர் என்ற நிறுவனம் பிரதான அனுசரணை வழங்கும் இப் போட்டியில் 30 நாடுகளைச் சேர்ந்த வீராங்கனைகள் விளையாடவுள்ளனர்.

6 அணிகள் 15 லீக் போட்டிகளில் விளையாடும். லீக் சுற்று முடிவடைந்ததும் அணிகள் நிலையில் முதல் 4 இடங்களில் உள்ள அணிகள் இறுதிச் சுற்றில் விளையாட தகுதிபெறும்.