தவறவிடாதீர்கள்..!உடனே பதிவு செய்யுங்கள்

(எம்.மனோசித்ரா)

நாட்டில் தற்போது ஏற்பட்டுள்ள அரசியல் நெருக்கடி தொடர்பான நிலைப்பாட்டை உடனடியாக நாட்டு மக்களுக்கு வெளிப்படுத்துமாறு ஐக்கிய தேசிய கட்சியின் தலைவரும் முன்னாள் பிரதமருமான ரணில் விக்கிரமசிங்க அரசாங்கத்தை வலியுறுத்தியுள்ளார்.

முன்னாள் பிரதமர் ரணில் விக்கிரமசிங்கவின் கோரிக்கைக்கு அமைய புதன்கிழமை (20) இடம்பெற்ற விசேட கட்சி தலைவர் கூட்டத்தில், நாட்டில் நிலவும் நெருக்கடி நிலைமைக்கு துரிதமாக தீர்வினை வழங்குமாறும் அவர் கேட்டுக் கொண்டார்.

இதன் போது கருத்து வெளியிட்ட ரணில் விக்கிரமசிங்க , 'ரம்புக்கனை பிரதேசத்தில் ஆர்ப்பாட்டத்தில் ஈடுபட்டவர்கள் மீது துப்பாக்கிப்பிரயோகம் மேற்கொள்ளப்பட்டதையடுத்து நாட்டில் பதற்றமானதொரு நிலைமை ஏற்பட்டுள்ளது. மக்களின் பிரச்சினைகளுக்கு தீர்வு வழங்கப்படாவிட்டால் நிலைமை மேலும் மோசமடையும்.' என்று குறிப்பிட்டார்.

நாட்டில் ஏற்பட்டுள்ள அரசியல் நெருக்கடி நிலைமை தொடர்பில் கருத்து வெளியிட்ட அவர் , 'ஜனாதிபதி உள்ளிட்ட அரசாங்கத்துடன் செயற்படப்போவதில்லை என்று எதிர்க்கட்சிகள் தெரிவித்துள்ளன.

எனவே அரசியல் நெருக்கடி நிலைமை தொடர்பில் அரசாங்கமும் அண்மையில் அரசாங்கத்திலிருந்து விலகியவர்களும் தமது நிலைப்பாட்டினை நாட்டுக்கு வெளிப்படுத்த வேண்டும் என்று கேட்டுக் கொண்டார்.

கட்சி தலைவர்கள் ஒன்று கூடி நெருக்கடிகள் தொடர்பில் இறுதி தீர்மானத்தை எட்ட வேண்டும். நாட்டிலுள்ள நிலைமைகள் பாராளுமன்றத்தினால் கட்டுப்படுத்தப்பட்டு மக்களுக்கு நிவாரணத்தை வழங்குவதற்கான நடவடிக்கைகள் முன்னெடுக்கப்பட வேண்டும் என்றும் முன்னாள் பிரதமர் இதன் போது வலியுறுத்தியுள்ளார்.