எதிர்பார்ப்பும் ஏமாற்றமும் !

(கபில்)

“ஜனாதிபதியின் உரையில், இனப் பிரச்சினைக்கான தீர்வு பற்றியோ, இன நல்லிணக்க விவகாரங்கள் குறித்தோ, மட்டுமல்ல மாகாண சபைத் தேர்தல் பற்றிக் கூட கூறப்படவில்லை”

“பல மாதங்களுக்கு முன்பு பேச்சுவார்த்தைக்கு அழைத்துவிட்டு பின்னர் மீண்டும் அறிவிக்கின்றேன் என்று கூறிய ஜனாதிபதி கோட்டாபயவை சம்பந்தனும், கூட்டமைப்பும் சரியாக புரிந்து கொள்ளாது நல்லிணக்க சமிக்ஞைகளை வெளிப்படுத்துவார் என்றும்இ பேச்சுக்கு அழைப்பார் என்றும் நம்பியதும் நம்பிக் கொண்டிருப்பது தான் தவறு”

கடந்த வாரத்தில் பெரிதும் எதிர்பார்ப்புக்குரிய விடயமாக இருந்தது, பாராளுமன்றத்தில் ஜனாதிபதி கோட்டாபய நிகழ்த்திய அரசாங்கத்தின்கொள்கை விளக்க உரை. அந்த உரை பரவலான ஏமாற்றத்தை ஏற்படுத்தியிருக்கிறது.

கடந்த மாதம் பாராளுமன்றத்தை திடீரென ஒத்திவைத்து விட்டு, சிங்கப்பூருக்குப் புறப்பட்டுச் சென்றிருந்தார் ஜனாதிபதி.

ஏன், எதற்காக அவர் பாராளுமன்றத்தை ஒத்திவைத்தார் என்ற கேள்விக்கு, இன்று வரை பதில் இல்லை.

பாராளுமன்றக் கூட்டத்தொடரை, ஒரு மாதம் வரை, ஒத்திவைக்கும் அதிகாரம், அவருக்கு உள்ளது. அவர் அந்த அதிகாரத்தைப் பயன்படுத்திக் கொண்டார், அவ்வளவு தான் மக்களுக்குத் தெரியும்.