தவறவிடாதீர்கள்..!உடனே பதிவு செய்யுங்கள்

சப்புகஸ்கந்தவில் பயணப்பையொன்றிலிருந்து பெண்ணொருவர் சடலமாக மீட்கப்பட்ட சம்பவம் தொடர்பில் சந்தேகத்தின் பேரில் இருவர் கைதுசெய்யப்பட்டுள்ளதாக பொலிஸார் தெரிவித்தனர்.

குறித்த சம்பவத்துடன் மட்டக்குளி, சமித்புரவைச் சேர்ந்த 36 வயதான கணவன், மனைவி ஆகியோரே  இவ்வாறு களனி வலய குற்ற விசாரணைப்பிரிவினரால் கைதுசெய்யப்பட்டுள்ளனர்.

இதேவேளை, பெண்ணின் சடலத்தை ஏற்றிச்சென்றதாக கருதப்படும் வாகனமொன்றையும் பொலிஸார் கைப்பற்றியுள்ளனர்.

நேற்று முன்தினம் வியாழக்கிழமை   சப்புகஸ்கந்த எண்ணெய் சுத்திகரிப்பு நிலையத்தை அண்மித்த குப்பைகொட்டுமிடத்திற்கு அருகில் கைவிடப்பட்டிருந்த பயணப்பையிலிருந்து பெண்ணொருவரின் சடலம் மீட்கப்பட்டிருந்தது.

இவ்வாறு சடலமாக மீட்கப்பட்ட பெண், மாளிகாவத்தை தொடர்மாடிக் குடியிருப்பை வசிப்பிடமாகக் கொண்டிருந்த 2 பிள்ளைகளின் தாயான, 44 வயதுடைய மொஹமட் ஷாபி பாத்திமா மும்தாஸ்  என அவரது கணவரும் 2 பிள்ளைகளும் ராகம போதனா வைத்தியசாலையின் பிரேத அறையில் சடலத்தை நேற்று பார்வையிட்டதன் பின்னர் குறித்த பெண்ணின் சடலம் இனங்காணப்பட்டிருந்தமை குறிப்பிடத்தக்கது.