தவறவிடாதீர்கள்..!உடனே பதிவு செய்யுங்கள்

(நா.தனுஜா)
கொவிட் - 19 வைரஸ் பரவலுக்கு எதிரான நோயெதிர்ப்பு சக்தியை உருவாக்கக்கூடியவாறான சைனோபாம் தடுப்பூசியின் செயற்திறன் தொடர்பில் ஸ்ரீ ஜயவர்தனபுர பல்கலைக்கழகத்தினால் மேற்கொள்ளப்பட்டிருக்கும் ஆய்வுகள் தற்போதைய சூழ்நிலைக்கு மிகவும் அவசியமானதும் பொருத்தமானதுமாகும் என சீனா பாராட்டுத் தெரிவித்திருக்கின்றது.

சீனாவினால் உற்பத்திசெய்யப்படும் சைனோபாம் தடுப்பூசியைப் பெற்றுக்கொண்டவர்களில் 95 சதவீதமானோருக்கு டெல்டா வைரஸ் தொற்றிலிருந்து பாதுகாப்புப்பெறக்கூடியவாறான நோயெதிர்ப்புசக்தி விருத்தியடைவது ஸ்ரீ ஜயவர்தனபுர பல்கலைக்கழகத்தினால் மேற்கொள்ளப்பட்ட ஆய்வுகளின் மூலம் கண்றியப்பட்டுள்ளது.

இதுகுறித்து ஸ்ரீ ஜயவர்தனபுர பல்கலைக்கழகத்தினால் வெளியிடப்பட்டுள்ள தகவல்களை மேற்கோள்காட்டி, இலங்கையிலுள்ள சீனத்தூதரகத்தின் உத்தியோகபூர்வ டுவிட்டர் பக்கத்தில் செய்யப்பட்டிருக்கும் பதிவிலேயே மேற்கண்டவாறு குறிப்பிடப்பட்டுள்ளது. அப்பதிவில் மேலும் கூறப்பட்டிருப்பதாவது:

திரிபடைந்த டெல்டா வைரஸிற்கு எதிரான நோயெதிர்ப்புசக்தியை உருவாக்கக்கூடிய வகையிலான சைனோபாம் தடுப்பூசியின் செயற்திறன் தொடர்பில் உலகிலேயே முதலாவதாக முன்னெடுக்கப்பட்ட ஆய்வுகளின் முடிவுகள் வெளியாகியிருப்பதுடன் அவை மிகவும் வரவேற்கத்தக்கவையாக உள்ளன. தற்போதைய சூழ்நிலைக்கு மிகவும் அவசியமானதும் பொருத்தமானதுமான இந்த ஆய்வை முன்னெடுத்த பேராசிரியர் நீலிகா மலவிகே மற்றும் வைத்தியநிபுணர் சந்திம ஜீவந்தர ஆகியோருக்கு எமது நன்றியை வெளிப்படுத்த விரும்புகின்றோம்.  

மேற்படி ஆய்வுகளின் பிரகாரம், சைனோபாம் தடுப்பூசிகளைப் பெற்றுக்கொண்டவர்களின் 95 சதவீதமானோருக்கு நோயெதிர்ப்புசக்தி உருவாவது கண்டறியப்பட்டுள்ளது. இந்த நோயெதிர்ப்புசக்தியானது கொவிட் - 19 வைரஸின் திரிபுகளான டெல்டா மற்றும் பீற்றா ஆகியவற்றுக்கு எதிரான செயற்திறனைக் கொண்டிருக்கின்றன என்று அப்பதிவில் சுட்டிக்காட்டப்பட்டுள்ளமை குறிப்பிடத்தக்கது.