கண்டி - மடுல்கலை அரசினர் பொது வைத்தியசாலைக்கு மருத்துவ உபகரணங்கள் அன்பளிப்பு

Published By: Gayathri

24 May, 2021 | 02:58 PM

நாட்டில் கொவிட் தொற்று நிலை நாளாந்தம் அதிகரித்து வருகின்ற நிலையில், தொற்றாளர்களுக்கு முறையான சிகிச்சை வழங்குவதற்குத் தேவையான மருத்துவ உபகரணங்களுக்கும், நோயாளர்களின் தினசரி பாவனைக்குத் தேவையான பொருட்களுக்கும் தட்டுப்பாடு நிலவுவதாக வைத்தியசாலை வட்டாரத் தகவல்களில் இருந்து அறியக்கூடியதாக இருக்கின்றது.

இத் தகவலின் அடிப்படையில் கண்டி மாவட்டத்தில் மடுல்கலையில் அமைந்துள்ள அரசினர் பொது வைத்தியசாலையின் பிரதான வைத்தியரை தொடர்பு கொண்ட மால்போ டிரேடிங் கம்பனி உரிமையாளரும், மடுல்கலை பிரதேசத்தை பிறப்பிடமாகக் கொண்டவருமான முத்துவேல் மணிமுத்து அங்கு நிலவும் குறைபாடுகளைக் கேட்டறிந்தார்.

அதன் பின்னர், கண்டி பிராந்திய சுகாதார சேவைகள் பணிப்பாளர் மற்றும் பிரதிப் பணிப்பாளர் ஆகியோரின் வழிகாட்டல் மற்றும் ஆலோசனையின் பேரில் மேற்படி வைத்தியசாலைக்குத் தேவையான பொருட்களை வழங்குவதற்கு முத்துவேல் மணிமுத்து நடவடிக்கைகளை முன்னெடுத்ததுடன் அப் பொருட்கள் கண்டி, பிராந்திய சுகாதார சேவைகள் பணிப்பாளர் அவர்களின் கண்காணிப்பின் கீழ் 21.05.2021 அன்று உரிய அதிகாரிகளிடம் கையளிக்கப்பட்டது.