தனிமைப்படுத்தல் விதிகளை மீறிய 3,233 பேர் கைது

(எம்.மனோசித்ரா)

தனிமைப்படுத்தல் விதிகள் முறையாக பின்பற்றப்படுகின்றனவா என்பது தொடர்பான கண்காணிப்பு நடவடிக்கைகள் தொடர்ந்தும் முன்னெடுக்கப்பட்டு வருகிறது.

அதற்கமைய இன்று வியாழக்கிழமை காலை 6 மணியுடன் நிறைவடைந்த 24 மணித்தியாலத்தில் தனிமைப்படுத்தல் விதிகளை மீறிய 11 பேர் கைது செய்யப்பட்டுள்ளதாக பொலிஸ் ஊடகப் பேச்சாளர் பிரதிப் பொலிஸ்மா அதிபர் அஜித் ரோஹன தெரிவித்தார்.

இது தொடர்பில் அவர் மேலும் கூறுகையில்,

கடந்த ஆண்டு ஒக்டோபர் மாதம் 30 ஆம் திகதி முதல் தற்போது வரை தனிமைப்படுத்தல் விதிகளை மீறிய 3,233 பேர் கைது செய்யப்பட்டுள்ளனர். இவ்வாறான கண்காணிப்பு நடவடிக்கை தொடர்ந்தும் முன்னெடுக்கப்படும்.

நாளை வெள்ளிக்கிழமை முதல் 3 நாட்கள் தொடர் விடுமுறை நாட்கள் என்பதால் பொதுமக்கள் வெளியிடங்களில் ஒன்று கூடுவதற்கான வாய்ப்புக்கள் அதிகமாகும். எவ்வாறிருப்பினும் தனிமைப்படுத்தல் விதிகளை தொடர்ந்தும் பின்பற்றுமாறு கேட்டுக் கொள்கின்றோம்.

கொவிட் தடுப்பூசி வழங்கும் வேலைத்திட்டத்திற்கு அமைய புதன்கிழமை 2,583 பொலிஸ் உத்தியோகத்தர்களுக்கு கொவிட் தடுப்பூசி ஏற்றப்பட்டது. அதற்கமைய இதுவரையில் 17, 914 பொலிஸ் உத்தியோகத்தர்களுக்கு கொவிட் தடுப்பூசி வழங்கப்பட்டுள்ளது என்றார்.